ವಿವ ನ್ಯೂಸ್ ಕನ್ನಡ - ಇದು ಸುದ್ದಿಗಳ ಡಬ್ಬಿ

ಟ್ರಂಪ್‌ ಕೋಪಕ್ಕೆ ತುತ್ತಾದ ಅಮೆರಿಕ ಸೇನಾ ಮುಖ್ಯಸ್ಥನಿಗೆ ಗೇಟ್ ಪಾಸ್ ...

ವಾಷಿಂಗ್ಟನ್‌ : ಟ್ರಂಪ್ ಕೋಪಕ್ಕೆ ತುತ್ತಾದ ಅಮೆರಿಕ ಸೇನಾ ಮುಖ್ಯಸ್ಥ ಜನರಲ್‌ ರಾಂಡಿ ಜಾರ್ಜ್‌ ಅವರನ್ನು ಕೆಲಸದಿಂದ ಕಿತ್ತು ಹಾಕಲಾಗಿದೆ. ಇರಾನ್‌ ವಿರುದ್ಧದ ಯುದ್ಧದಲ್ಲಿ ಟ್ರಂಪ್‌ ಸರ್ಕಾರಕ್ಕೆ ಹಿನ್ನೆಡೆಯಾಗಿದೆ ಎಂಬ ಸುದ್ದಿಗಳ ನಡುವೆಯೇ ಅಮೆರಿಕದ ರಕ್ಷಣಾ ಕಾರ್ಯದರ್ಶಿ ಪೀಟ್‌ ಹೆಗ್ಸೆತ್‌ ಅವರು ಸೇನಾ ಮುಖ್ಯಸ್ಥ ಜನರಲ್‌ ರಾಂಡಿ ಜಾರ್ಜ್‌ ಅವರಿಗೆ ತಕ್ಷಣವೇ ರಾಜೀನಾಮೆ ನೀಡುವಂತೆ ಸೂಚಿಸಿದ್ದಾರೆ ಎಂದು ವರದಿಯಾಗಿದೆ. ಜನರಲ್‌ ರಾಂಡಿ ಜಾರ್ಜ್‌ ಅವರು 2023 ರಲ್ಲಿ ಸೇನಾ ಮುಖ್ಯಸ್ಥರಾಗಿ ನೇಮಕಗೊಂಡಿದ್ದರು ಮತ್ತು ಅವರ ಅವಧಿಯು 2027 ರವರೆಗೆ ಇತ್ತು. ಪೀಟ್‌ ಹೆಗ್ಸೆತ್‌ ಅವರು ಜನರಲ್‌ ರಾಂಡಿ ಜಾರ್ಜ್‌ ಅವರ ನಾಯಕತ್ವದ ಮೇಲೆ ನಂಬಿಕೆ ಮತ್ತು ವಿಶ್ವಾಸವನ್ನು ಕಳೆದುಕೊಂಡಿದ್ದಾರೆ ಎಂದು ತಿಳಿದುಬಂದಿದೆ. ರಾಂಡಿ ಜಾರ್ಜ್‌ ಅವರ ನಿರ್ಗಮನದ ನಂತರ, ಉಪ ಮುಖ್ಯಸ್ಥ ಜನರಲ್‌ ಕ್ರಿಸ್ಟೋಫರ್‌ ಲಾನೆವ್‌ ಅವರು ಹಂಗಾಮಿ ಸೇನಾ ಮುಖ್ಯಸ್ಥರಾಗಿ ಜವಾಬ್ದಾರಿ ವಹಿಸಿಕೊಳ್ಳಲಿದ್ದಾರೆ.ಟ್ರಂಪ್‌ ಅವರ ಆಡಳಿತದ ಯೋಜನೆಗಳನ್ನು ಜಾರಿಗೆ ತರುವಲ್ಲಿ ರಾಂಡಿ ಜಾರ್ಜ್‌ ವಿಫಲವಾದ ಹಿನ್ನೆಲೆಯಲ್ಲಿ ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ. ಟ್ರಂಪ್‌ ಅವರ ರಕ್ಷಣಾ ನೀತಿಗಳು ಹಾಗೂ ಸೇನೆಯ ಬಗ್ಗೆಗಿನ ಅವರ ದೃಷ್ಟಿಕೋನವನ್ನು ಯಾವುದೇ ಪ್ರಶ್ನೆಯಿಲ್ಲದೆ ಜಾರಿಗೆ ತರುವಂತಹ ವ್ಯಕ್ತಿಯನ್ನು ಆ ಹುದ್ದೆಯಲ್ಲಿ ನೇಮಿಸಲು ಹೆಗ್ಸೆತ್‌ ಬಯಸಿದ್ದಾರೆ. ರಾಂಡಿ ಜಾರ್ಜ್‌ ಅವರು ಈ ಹಿಂದೆ ಜೋ ಬೈಡನ್‌ ಅವರ ಆಡಳಿತದಲ್ಲಿ ರಕ್ಷಣಾ ಕಾರ್ಯದರ್ಶಿಯಾಗಿದ್ದ ಲಾಯ್‌್ಡ ಆಸ್ಟಿನ್‌ ಅವರ ಸಹಾಯಕನಾಗಿ ಕೆಲಸ ಮಾಡಿದ್ದರು. ಇದು ಕೂಡ ಅವರನ್ನು ಗುರಿಯಾಗಿಸಲು ಒಂದು ಕಾರಣ ಎಂದು ವಿಶ್ಲೇಷಿಸಲಾಗಿದೆ. ಇತ್ತೀಚಿನ ದಿನಗಳಲ್ಲಿ ಪೀಟ್‌ ಹೆಗ್ಸೆತ್‌ ಅವರು ಹಿರಿಯ ಮಿಲಿಟರಿ ಅಧಿಕಾರಿಗಳನ್ನು ಸರಣಿಯಾಗಿ ವಜಾಗೊಳಿಸುತ್ತಿದ್ದು, ಸೇನೆಯ ಉನ್ನತ ಹುದ್ದೆಗಳಲ್ಲಿ ತಮಗೆ ಆಪ್ತರಾದವರನ್ನು ಮತ್ತು ತಮ್ಮ ಸಿದ್ಧಾಂತಕ್ಕೆ ಪೂರಕವಾದವರನ್ನು ನೇಮಿಸುತ್ತಿದ್ದಾರೆ. ನೌಕಾಪಡೆಯ ಉನ್ನತ ಅಧಿಕಾರಿ ಅಡ್ಮಿನಿಸ್ಟ್ರೇಟರ್‌ ಲಿಸಾ ಫ್ರಾಂಚೆಟ್ಟಿ ಮತ್ತು ವಾಯುಪಡೆಯ ನಂ. 2 ನಾಯಕ ಜನರಲ್‌ ಜಿಮ್‌ ಸಿಲ್‌್ಫ ಸೇರಿದಂತೆ ಒಂದು ಡಜನ್‌ಗಿಂತಲೂ ಹೆಚ್ಚು ಹಿರಿಯ ಅಧಿಕಾರಿಗಳನ್ನು ಹೆಗ್ಸೆತ್‌ ತೆಗೆದುಹಾಕಿದ್ದಾರೆ.