ವಿವ ನ್ಯೂಸ್ ಕನ್ನಡ - ಇದು ಸುದ್ದಿಗಳ ಡಬ್ಬಿ

ತಾಲೂಕು ಮಟ್ಟದ ಪ್ರತಿಭಾ ಕಾರಂಜಿ ಮತ್ತು ಕಲೋತ್ಸವ – ಕಲಘಟಗಿಯಲ್ಲಿ ವೈಭವ

ಕಲಘಟಗಿ, ಧಾರವಾಡ: ಕಲಘಟಗಿ ಪಟ್ಟಣದ ಹೊರವಲಯದಲ್ಲಿರುವ ಸೇಂಟ್ ಮೇರಿ ಆಂಗ್ಲ ಮಾದರಿ ಶಾಲೆಯಲ್ಲಿ ಬುಧವಾರ 2025–26ನೇ ಸಾಲಿನ ತಾಲೂಕು ಮಟ್ಟದ ಪ್ರತಿಭಾ ಕಾರಂಜಿ ಮತ್ತು ಕಲೋತ್ಸವ ಭವ್ಯವಾಗಿ ನೆರವೇರಿತು. ಧಾರವಾಡ ಜಿಲ್ಲಾ ಪಂಚಾಯಿತಿ, ಶಿಕ್ಷಣ ಇಲಾಖೆ, ಕಲಘಟಗಿ ಕ್ಷೇತ್ರ ಶಿಕ್ಷಣಾಧಿಕಾರಿಗಳ ಕಚೇರಿ, ಕ್ಷೇತ್ರ ಸಮನ್ವಯಾಧಿಕಾರಿಗಳ ಕಚೇರಿ ಹಾಗೂ ಆತಿಥೇಯ ಶಾಲೆಯ ಸಂಯುಕ್ತ ಆಶ್ರಯದಲ್ಲಿ ಈ ಕಾರ್ಯಕ್ರಮ ಆಯೋಜಿಸಲಾಯಿತು. ಕಾರ್ಯಕ್ರಮಕ್ಕೆ ಕ್ಷೇತ್ರ ಶಿಕ್ಷಣಾಧಿಕಾರಿ ಶ್ರೀಮತಿ ಗಾಯತ್ರೀದೇವಿ ಸಜ್ಜನ, ಸಮನ್ವಯಾಧಿಕಾರಿಗಳು ಸಿ.ಸಿ. ಅಳಗೋಡಿ ಮತ್ತು ತಿಮ್ಮಾರೆಡ್ಡಿ, ಪಂಚಾಯತ್ ಅಭಿವೃದ್ಧಿ ಅಧಿಕಾರಿ ಪ.ಪಂ. ಶಿಲ್ಪಾ ಪಾಳಕರ, ಜಗದೀಶ ವೀರಕ್ತಮಠ, ಆರ್.ಎಂ. ಹೊಲ್ತಿಕೋಟಿ, ಐ.ವಿ. ಜವಳಿ ಹಾಗೂ ಬೇರೆ ಹಲವು ಗಣ್ಯರು ಹಾಜರಿದ್ದರು.

ಶಾಲೆಯ ಮುಖ್ಯೋಪಾಧ್ಯಾಯ ಫಾದರ್ ಜಾರ್ಜ್ ಮೋನಿಸ್, ಫಾದರ್ ರಿಚರ್ಡ್, ಉಪಮುಖ್ಯೋಪಾಧ್ಯಾಯ ಫಾದರ್ ದೇವಸ್ಯ, ಪ್ರಧಾನ ಕಾರ್ಯದರ್ಶಿ ಸ್ಪ್ರಿಂಗ್ಸ್ಟನ್ ಡಿಸೋಜಾ ಸೇರಿದಂತೆ ನೌಕರ ಸಂಘಗಳ ಪದಾಧಿಕಾರಿಗಳು, ಶಿಕ್ಷಕರು–ಶಿಕ್ಷಕಿಯರು, ಪಾಲಕರು ಮತ್ತು ವಿದ್ಯಾರ್ಥಿಗಳು ಹೆಚ್ಚಿನ ಸಂಖ್ಯೆಯಲ್ಲಿ ಭಾಗವಹಿಸಿದರು. ವಿದ್ಯಾರ್ಥಿಗಳು ನೃತ್ಯ, ಸಂಗೀತ, ಚಿತ್ರಕಲೆ, ಕವಿತಾ ವಾಚನ, ನಾಟಕ, ವಿಜ್ಞಾನ ಮಾದರಿ ಪ್ರದರ್ಶನ ಸೇರಿದಂತೆ ಹಲವು ವಿಭಾಗಗಳಲ್ಲಿ ತಮ್ಮ ಪ್ರತಿಭೆಯನ್ನು ತೋರಿದರು. ದಿನಪೂರ್ತಿ ಜೋರಾಗಿ ನಡೆದ ಸ್ಪರ್ಧೆಗಳು ಕಲಘಟಗಿ ತಾಲೂಕಿನ ವಿದ್ಯಾರ್ಥಿ ಪ್ರತಿಭೆಗೆ ವೇದಿಕೆ ಒದಗಿಸಿತು.